Zec 8 | NdeIBE | STEP | Lafika njalo kimi ilizwi likaJehova uSomandla.

Zechariah 8

Inkosi Ithembisa Ukubusisa IJerusalema

1 Lafika njalo kimi ilizwi likaJehova uSomandla. 2 Nanku okutshiwo nguJehova uSomandla: “Ngilobukhwele kabi ngeZiyoni; ngiyatsha ngobukhwele ngayo.”

3 Nanku okutshiwo nguJehova: “Ngizabuyela eZiyoni ngihlale eJerusalema. Lapho-ke iJerusalema izathiwa nguMuzi weQiniso, lentaba kaJehova uSomandla izabizwa ngokuthi yiNtaba eNgcwele.”

4 Nanku okutshiwo nguJehova uSomandla, uthi: “Kuzakwenzakala njalo ukuthi amaxhegu lezalukazi bahlale nje ezitaladini zeJerusalema, ngulowo lodondolo lwakhe esandleni ngenxa yokuluphala. 5 Izitalada zedolobho zizaphithizela abafana lamantombazana bezidlalela khona.”

6 Nanku okutshiwo nguJehova uSomandla, uthi: “Kungabonakala njengesimanga kwabayinsalela yalababantu ngalesosikhathi, kodwa kambe kungabonakala njengesimanga kimi na?” kutsho uJehova uSomandla.

7 Nanku okutshiwo nguJehova uSomandla, uthi: “Ngizabasindisa abantu bami emazweni asempumalanga lasemazweni asentshonalanga.

8 Ngizababuyisela bayohlala eJerusalema; bazakuba ngabantu bami, lami ngizathembeka njalo ngibe lokulunga kubo njengoNkulunkulu wabo.”

9 Nanku okutshiwo nguJehova uSomandla, uthi: “Lina okwamanje eliwezwayo amazwi la akhulunywa ngabaphrofethi ababekhona kubekwa isisekelo sendlu kaJehova uSomandla, qinisani izandla zenu ukuze ithempeli lakhiwe.

10 Mandulo kwesikhathi leso kwakungekho imbadalo ngomsebenzi womuntu loba owenyamazana. Umuntu loba engubani wayengazihambeli loba azenzele okwakhe ekhululekile ngenxa yezitha, ngokuba abantu ngasengibaxabanise labomakhelwana babo.

11 Kodwa khathesi kangisayikwenza kulaba abayinsalela njengalokho engakwenzayo endulo,” kutsho uJehova uSomandla.

12 “Inhlanyelo izakhula kuhle, ivini lizakhupha izithelo zalo, umhlabathi uzakhulisa amabele, lamazulu azakwehlisa amazolo awo. Zonke lezizinto ngizazinika njengelifa kwabayinsalela yalababantu. 13 Njengoba beliyinto ethukiweyo phakathi kwezizwe, wena Juda lo-Israyeli, ngakho ngizalisindisa libe yisibusiso. Lingesabi, kodwa qinisani izandla zenu.”

14 Nanku akutshoyo uJehova uSomandla, uthi: “Kanjengalokhu ngasengimisile ukwehlisela umonakalo phezu kwenu angaze ngatshengisa uzwelo lapho okhokho benu bangizondisa,” kutsho uJehova uSomandla,

15 “yikho manje sengimisile ukwenza ubuhle njalo eJerusalema lakoJuda. Lingesabi. 16 Nanzi izinto okumele lizenze: Khulumani iqiniso omunye komunye, njalo lehlulelane ngeqiniso langokuqonda emithethwandaba yenu;

17 lingakheli umakhelwana wenu amacebo amabi, njalo lingaze lathanda ukufunga ngokungamanga. Konke lokhu ngiyakuzonda,” kutsho uJehova.

18 Laphinda leza kimi njalo ilizwi likaJehova.

19 Nanku akutshoyo uJehova uSomandla, uthi, “Amazilo awenyanga yesine, leyesihlanu, leyesikhombisa kanye leyetshumi azakuba yizikhathi zokuthokoza lokujabula, abe yimikhosi yokuthaba koJuda. Ngakho-ke thandani iqiniso lokuthula.”

20 Nanku akutshoyo uJehova uSomandla: “Abantu abanengi lezakhamizi zamadolobho amanengi basezakuza, 21 njalo izakhamizi zedolobho leli zizakuya kwezakuleliyana zifike zithi, ‘Kasihambe khathesi lokhu siyoncenga uJehova, simfune uJehova uSomandla. Mina sengihamba.’ 22 Kuzakuthi abantu abanengi lezizwe ezilamandla zizakuza eJerusalema ukuzafuna uJehova uSomandla bezocela kuye.

23 Nanku akutshoyo uJehova uSomandla, uthi: “Ngalezonsuku amadoda alitshumi aphuma kuzo zonke izindimi lezizwe azagagadlela umphetho wengubo yomJuda oyedwa athi, ‘Wothi sihambe lawe ngoba sesizwile ukuthi uNkulunkulu ulani.’ ”